Provediment cun aua

En in rapport d’inspecziun cumplessiv ha l’Uffizi chantunal per la segirezza da victualias e per la sanadad d’animals ordinà che la vischnanca da Trin sto realisar il proxim temp differentas mesiras vi da ses provediment cun aua. Cun prioritad pertutga quai la tschiffada da la funtauna Turnigla, il tumbin da controlla Turnigla ed il reservuar Turnigla. Igl ha num reparar u remplazzar differentas parts da l’implant per ch’ellas correspundian puspè a las reglas ed al stadi actual da la tecnica.

Il biro d’inschigneria Werk13 Ingenieure (pli baud Marugg + Bruni AG) ha elavurà il 2022 cun il project «renovaziun reservuar chombra d’aua Turnigla» in rapport davart il stadi cun in studi da variantas per mauns da la vischnanca da Trin. La vischnanca ha da quel temp pretendì ina renovaziun durabla a lunga vista, durant la quala las parts da l’implant che ston vegnir sanadas e remplazzadas hajan da correspunder a las pretensiuns actualas per aua da baiver ed a las necessitads dal manaschi puncto mantegniment e segirezza da lavur.

La suprastanza communala ha examinà la fin dal 2022 las variantas preschentadas ed è sa decidida da persequitar la varianta recumandada «construcziun nova ed engrondiment da la chombra d’aua dal reservuar». Tut las mendas existentas vegnan uschia eliminadas e la situaziun generala vegn adattada a las pretensiuns d’in reservuar d’aua da baiver d’ozendi e meglierada considerablamain a lunga vista. Quai pertutga tranter auter l’adattaziun da la grondezza ed entras quai dal temp che l’aua resta en il reservuar e la meglieraziun dals access al lieu e da la manipulaziun da las parts da l’implant per il mantegniment. Cun l’engrondiment planisà da la chascha dals schlegns vegn er optimà l’access direct a la chombra d’aua. Plinavant èsi pussaivel da montar in indriz da mesirar la deflussiun. Ina tala n’è actualmain betg avant maun.

Las fasas da projectaziun l’onn 2023 cumpiglian l’elavuraziun dal project da construcziun, la procedura da permissiun (BAB) e la publicaziun (submissiuns) da las prestaziuns necessarias e lavurs la stad 2023. Questas fasas duain vegnir terminadas enfin la fin d’avust 2023. Uschia po la suprastanza communala dumandar la fin da l’onn 2023 la radunanza communala per il credit necessari per las lavurs da construcziun planisadas e quai per in project da construcziun detaglià (incl. preventiv). Las lavurs da construcziun vegnan lura realisadas en il decurs da l’onn 2024.