Planisaziun locala

Cun la revisiun totala da la planisaziun locala realisescha la vischnanca da Trin il dretg surordinà ed ils principis directivs formulads en la planisaziun directiva communala a moda lianta per proprietarias e proprietaris. Vitiers vegnan ils instruments da planisaziun modernisads. Uschia prepara la vischnanca il terren per il svilup da la construcziun en ils proxims 10 fin 15 onns ed è ord vista planisatorica sin buna via per l’avegnir.

Dal dretg surordinà resulta per Trin en spezial l’obligaziun da garantir la disponibladad da terren da bajegiar e l’incassament d’ina taxa da plivalur tar mesiras da planisaziun. Igl è da garantir che terren da bajegiar enzonà stat a disposiziun a temp util per il diever previs en il plan da zonas. Sch’i vegn generà entras ina mesira da planisaziun in surpli da valur, sto quel cular per part en in fond communal lià ad in intent specific correspundent.

Auters accents da la revisiun totala èn midadas da zona ed azonaziuns per promover la concentraziun dals abitadis ed il svilup sco era la modernisaziun da la lescha da construcziun. En quest connex vegnan regulaziuns simplifitgadas tant sco pussaivel. L’execuziun vegn sclerida uschia che persunas che projecteschan e la vischnanca hajan segirezza giuridica.

L’elavuraziun da la revisiun totala da la planisaziun locala vegn accumpagnada d’ina gruppa da lavur. Quella consista da represchentantas e represchentants da la populaziun, da la cumissiun da construcziun e da la suprastanza communala. Ella garantescha ch’ils basegns da la populaziun da Trin vegnan resguardads a moda commensurada en il rom da la revisiun totala.

Actualmain sa chatta la revisiun totala da la planisaziun locala en l’examinaziun preliminara dal Chantun. Suenter vegn la populaziun infurmada davart il cuntegn da la planisaziun. En il rom da l’exposiziun da cooperaziun vegn ella integrada en la planisaziun e silsuenter po la radunanza communala decretar la revisiun totala.