En in document da pergiamina en la claustra da Mustér è da leger ch’il chastè da Crap S. Bargatzi è vegnì construì l’onn 750 a Trin. Ils 2 da fanadur 1470 è el daventà unfrenda da las flommas e n’è suenter betg pli vegnì reconstruì. Il chastè da Canaschal deriva dal 12avel tschientaner ed è stà la fortezza prestanta dal Crap S. Bargatzi. Quests dus implants han ins construì da quel temp per pudair controllar la via en Surselva. Quella manava lura anc tras Digg, nua che sa chattavan er il dazi e la plazza da fiera. Da Digg ha la via manà sur prads ed ers a Pintrun e vinavant sur Conn a Sagogn.

L’onn 1802 èn ils Franzos marschads tras il Grischun e cun quai era tras Trin. La populaziun da Trin ha gì da furnir proviant a las truppas. Da quel temp ha la vischnanca da Trin gì radund 800 abitantas ed abitants. Enfin la fin dal 19avel tschientaner è il dumber da la populaziun sa sminuì sin 600 persunas. Il 19avel tschientaner è pia daventà quel tschientaner, durant il qual ils da Trin han stuì ir a l’ester per chattar lavur. A l’exteriur eran els fitg dumandads sco constructurs e mastergnants capabels ed han era gì success. Descendents da quests pioniers vivan anc oz en divers pajais da l’Europa e vi surmar.