Allontanament d’aua persa

Il 2010 è l’ARA Dabi vegnida sanada ed engrondida l’ultima giada. A medem temp è l’ARA Isla a Trin Mulin vegnida liquidada sco ARA autonoma e vegnida transfurmada en in implant da pumpadi per aua persa – cun attatg a l’ARA Dabi.

Tenor il rapport annual 2021 da l’Uffizi per la natira e l’ambient dal Grischun (UNA) n’è l’ARA Dabi, che ha ussa gia 13 onns (incl. implant da pumpadi per aua persa Isla), betg pli dimensiunada optimalmain per las pretensiuns idraulicas. En vista als proxims onns da gestiun ed il mantegniment da valur e da funcziun èn necessarias investiziuns pli grondas a curta ed a media vista, enfin ch’i dat ina nova revisiun totala u ina schliaziun alternativa (p.ex. en furma d’ina colliaziun da l’aua persa a l’ARA Tuma Lunga da Domat).

En connex cun l’aua persa lavura la vischnanca da Trin perquai dapi l’atun 2022 ensemen cun il center da cumpetenza ARA da la Caprez Ingenieure AG per esser cussegliada a moda solida per las lavurs ed ils svilups necessaris per ils proxims onns. Vitiers tutga era l’elavuraziun d’in plan da mesiras che tegna en egl il mument ch’i dovra ina renovaziun cumpletta da la serenera. En in emprim pass han ils experts da la Caprez Ingenieure AG fatg ina visita oculara extendida ed evaluà ils implants e lur parts. Suenter è suandada in’analisa idraulica dal sistem d’auas persas per identifitgar puncts flaivels. Pir cura che eventualas problematicas da l’idraulica èn schliadas, vegn cumenzà cun la lavur dal plan da mesiras (probablamain il 2023/2024). En quel vegn evaluà il stadi da las singulas parts da l’implant ed i vegnan deducidas e preschentadas las mesiras necessarias per mantegnair la funcziun e la valur enfin ad ina renovaziun cumpletta. En quest connex vegnan las lavurs priorisadas tenor urgenza ed arranschadas en pachets da mesiras che vegnan realisads communablamain. Perquai ch’investiziuns pli grondas èn necessarias per mantegnair la valur e la funcziunalitad, duai danovamain vegnir examinada ina colliaziun da la vischnanca da Trin ad ina autra Z-ARA sco alternativa. Cun in tal plan da mesiras survegn la vischnanca ina survista davart il basegn per il mantegniment e sanaziuns futuras sco era ina basa impurtanta per planisar e decider da princip las investiziuns communalas.