Planisaziun locala

Approbaziun dalla revisiun totala dalla planisaziun dil territori

Alla radunonza communala dils 21 da zercladur 2024 ei vegnida votada la revisiun totala dalla planisaziun dil territori dalla vischnaunca da Trin.

La vischnaunca da Trin ha fatg en ils davos treis onns ina controlla cumplessiva dalla planisaziun dil territori, per menar la sviluppaziun spaziala dils proxims varga 15 onns e per ademplir las pretensiuns giuridicas surordinadas. Rezonaziuns miradas ed adattaziuns da zonas duessan promover ina sviluppaziun durabla dalla vischnaunca. Tuttina vegn la lescha da baghegiar revisiunada e modernisada. In ulteriur accent ei mess sin la realisaziun dallas disposiziuns legalas per garantir la disponibilitad da terren da baghegiar sco era sin la levada d’ina taxa per plusvalurs ch’ein causadas tras planisaziun (numnadamain la taxa da plusvalur).

Sviluppaziun dil territori abitau

La vischnaunca da Trin ei confruntada cun ina gronda damonda da spazi d’habitar. Sin basa dallas reservas en las zonas da baghegiar existentas ein novas zonaziuns actualmein buca pusseivlas. Perquei se concentrescha la vischnaunca da Trin, el rom dalla revisiun totala dalla planisaziun dil territori, sin ina densificaziun mirata en territoris ed areals adattai. Aschia duei vegnir engrondius e diversifitgiau il purschiu da spazi d’habitar, aschia che vegnin era creadas pli biars purschius per giuvens carstgauns, famiglias e persunas en etad da pensiun.

Mesiras el rom dalla revisiun totala (resumau):

• Zonaziuns miradas ed adattaziuns da zonas en las zonas Parlatsch (Mulin) sco era Quadris e Bavurca (vitg)
• Creaziun dalla zona da viver e zona da viver maschadada 3 per territoris cun la pusseivladad d’ina surbaghegiada relativamein densa
• Fixaziun d’ina obligaziun da plan da quartier per areals cun in potenzial considerabel da densificaziun
• Promoziun dalla disponibilitad da terren da baghegiar cun fixar obligaziuns da baghegiar per reservas da terren aunc buc surbaghegiadas

Sviluppaziun dil maletg dil vitg

Trin e sias fracziuns disponan d’ina aulta qualitad urbanistica. Trin Vitg e Trin Digg ein fixai el plan directiv cantunal sco maletgs da vitg degns da vegnir protegi. En tut las fracziuns anflan ins baghetgs prezius, plazs, funtanas sco era auters objects ed caracteristicas urbanisticas impurtontas. El rom dalla revisiun totala ein las reglas existentas vegnidas sviluppadas vinavon e particularmein damondas avertas davart l’execuziun clarificadas. En l’avegnir vegnin ils territoris centrals ed ils spazis da vias a survegnir ina pli gronda muntada. Ultra da quei ein las basas cantunalas concernent ils baghetgs prezius sco era ils objects da natira e cultura vegnidas resguardadas ed ei ei vegniu fixau in status da protecziun adattau per ils objects principals.

Mesiras el rom dalla revisiun totala (resumau):

• Sviluppar vinavon cun qualitad ils territoris centrals ed ils pli impurtonts spazis publics cun l’agid dalla cussegliaziun da furmaziun
• Densificaziun da qualitad en territoris sensibels tras la fixaziun d’obligaziuns da plan da quartier
• Protecziun dils pli impurtonts baghetgs sco era objects da natira e cultura cun endataziuns el plan general da furmaziun

Lescha da baghegiar

Cun la revisiun totala dalla planisaziun dil territori vegnan ils terms da baghegiar adattai a la Cunvegna intercantunala davart l’armonisar ils terms da baghegiar (IVHB). Ultra da quei vegnan fixadas ulteriuras prescripziuns cantunalas, sco ina utilisaziun minimala, las disposiziuns davart la mobilisaziun da terren da baghegiar sco era l’equiliber da plusvalurs. La densitad da baghegiar lubida vegn en futur reglada cun ina cifra da surbaghegiada. Quella fixescha tgei part dalla surfatscha dalla parcella che stat a disposiziun per la sviluppaziun constructiva. Il medem princip vegn applicau per la cifra da surfatscha verda, la quala garantischa in andament minimal da surfatscha verda en favur dalla biodiversitad e dalla segirezza d’in ciclus natural dall’aua.

Mesiras el rom dalla revisiun totala (resumau):

• Applicaziun dalla cifra da surbaghegiada per reglar la densitad lubida, en cumbinaziun cun l’altezza lubida dils baghetgs
• Introducziun d’ina cifra da surfatscha verda per garantir ina surfatscha verda adattada
• Levada da taxas da plusvalur en cass da novas zonaziuns, adaptaziuns da zonas e surzonaziuns

Approbaziun tras la radunonza communala

Il cussegl communal ha dumandau alla radunonza communala d’approbar la revisiun totala dalla planisaziun dil territori da Trin sin basa dall’art. 48 dalla Lescha davart la planisaziun dil territori dil cantun Grischun (KRG). Quest conclus includa l’entrada en vigur dils suandonts instruments da planisaziun:

Lescha da baghegiar, Plan da zonas, Plan general da furmaziun, Plan general d’avertura – traffic ed infrastructura, Plan general d’avertura – provediment ed evacuaziun

La radunonza communala ha approbau la revisiun totala dalla planisaziun dil territori cun 50 vuschs Gea encunter 26 vuschs Na. El decuors dalla discussiun ei ina proposta ord la populaziun vegnida declarada sco relevanta: la situaziun entuorn la midada d’utilisaziun d’abitaziuns principalas tenor dretg vegl en abitaziuns secundaras duei vegnir clarificada e pusseivlas mesiras presentadas ad ina radunonza communala posteriura.

La vischnaunca da Trin engrazia a tuttas persunas cun dretg da votar ed eleger per la confidonza concedida.

Documents

Messadi dalla radunonza communala dils 21 da zercladur 2024B

Dossier revisiun totala dalla planisaziun dil territori