Il dutg dalla Val Maliens che nescha sin l'Alp Mora (1'900 m s.m.) a Trin volva entuorn dapi tschiens onns gronda crappa, sablun e glera adina el medem liug. Aschia ein duront la lavur da tschentaners seformadas bogneras naturalas (mulins da glatscher). Mintga mulin da glatscher ha ina fuorma, ina pareta ed ina profunditad singulara. Certs ein pigns e bunamein rodunds ed auters han ina fuorma d'ellipsa ed ein gronds avunda per far bogn lien. La pli biala e gronda seria da mulins da glatscher anflan ins sin l'altezia dalla Mutta Sura, nua ch'ins contonscha bein las strusch 20 vanauns glacialas.
Duront ils meins da stad sescaulda l'aua clara sco cristal en quellas bogneras ed envida pign e grond da far in bogn extraordinari. Ils mulins da glatscher ein adina empleni cun aua, era cura ch'il dutg dalla Val Maliens meina negina aua.
Senda da viandar
Per ils ver 1'200 meters d'altezia (da Trin sin l'Alp Mora ed anavos) duess ins planisar rodund tschun uras. L'ascensiun strentga sin l'anteriura via d'alp da Trin tochen sin l'Alp Mora sepaga denton buca mo pervia dil bogn natural singular els mulins da glatscher, mobein era pervia dalla bellezia survesta ed il panorama fascinont.