Sut il num «Turunnio» vegn la vischnaunca da Trin documentada l'emprema ga pér la mesadad dil 12avel tschentaner. Duront il temps feudal s'udeva la vischnaunca tier il signeradi da Hohentrins. Ils 11 da schaner 1616 ha la vischnaunca pagau 11'200 flurins als signurs da Hohentrins per secumprar libra. Aunc oz ein numerus documents ed informaziuns da quei temps avon maun. Per ils tschentaners suandonts mauncan quels denton deplorablamein per gronda part. Probablamein ein quels documents vegni destrui duront ils aschinumnai «process encunter strias» la fin dil 18avel tschentaner, perquei ch'els cuntenevan nums da persunas, dallas qualas ins havess saviu reconstruir lur vegnentssuenter tochen oz. Ins suppona ch'ei seigi vegniu destruiu da quei temps aunc auters documents impurtonts che fussen stai da gronda muntada historica.
Tenor ina pergameina conservada ella claustra da Mustér ei il casti da Crap Sogn Barcazi (Hohentrins) vegnius construius igl onn 750. Ils 2 da fenadur 1470 eis el daventaus in'unfrenda dallas flommas e suenter buca pli vegnius reconstruius.
Il casti da Canaschal deriva dil 12avel tschentaner ed ha surviu sco fortezia prestonta da Crap Sogn Barcazi. Ils dus stabiliments ein vegni construi da lezzas uras per controllar la via en Surselva. La via mava lu aunc tras Digg, nua ch'ei deva era in post da duana ed ina plazza fiera. Naven da Digg menava la via tras praus ed ers tochen a Pintrun – Conn – Sagogn. Tochen avon 70 onns era igl uclaun da Pintrun aunc habitaus duront igl entir onn.
La derivonza dil num dalla fracziun Trin Mulin ei evidenta. Leu deva ei pli baul dus mulins ed ina resgia.
Igl onn 1802 ein ils Franzos marschai tras il Grischun e tras Trin. La populaziun da Trin ha giu da proveder las truppas cun proviant. Da quei temps haveva la vischnaunca da Trin rodund 800 habitonts. Tochen la fin dil 19avel tschentaner ei quei diember sesminuius a ver 600 habitonts. Il 19avel tschentaner ei stau il tschentaner d'emigraziun per biars da Trin che encurevan lavur. Egl jester ein els stai fetg dumandai ed han era giu success sco capomeisters e mistergners capavels. Ils vegnentssuenter da quels piuniers vivan aunc oz en differentas tiaras dall'Europa e surmar.
